| کسی طرح میں ترا جاں نثار ہو نہ سکا |
| اے میری زیست مجھے تجھ سے پیار ہو نہ سکا |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| جو کہہ رہا تھا گزاریں گے ساتھ عمر یہاں |
| ذرا بھی اس سے مرا انتظار ہو نہ سکا |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| میں کرچیوں میں کئی بار بٹ گیا تھا مگر |
| وہ ٹوٹ کے بھی کبھی تار تار ہو نہ سکا |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| وہ میرے ساتھ کھڑا تھا وہ میرے ساتھ نہیں |
| یہ بھید مجھ پہ کبھی آشکار ہو نہ سکا |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| اُسے یہ حق بھی نہیں ہے یہاں وہ سانس بھرے |
| وطن کی آن پہ جو جاں نثار ہو نہ سکا |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| عجیب طرح کی رہتا ہوں کشمکش میں یہاں |
| قرار بھی نہ ملا بے قرار ہو نہ سکا |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| وگرنہ ٹوٹ کے مانی میں رو پڑا تھا بہت |
| میں اُس کے سامنے بس اشک بار ہو نہ سکا |
معلومات