| وہ مسیحا بھی ہے مہدی بھی نبی ہوتے ہوئے |
| دی فرشتوں نے خبر اس کو وحی ہوتے ہوئے |
| حق کا پیغام ہَوا جب بھی کہیں لائی ہے |
| قدغنیں بنتی ہیں دیواریں کھڑی ہوتے ہوئے |
| نا خدا ہوتے ہوئے خود ہی کنارہ جو کرے |
| وہ تو نابینا رہا آنکھیں کھلی ہوتے ہوئے |
| چارہ گر آیا مریضوں کو ملی جس سے شفا |
| پھر سے دل زندہ ہوئے مُردہ دلی ہوتے ہوئے |
| ہو گیا وہ تو اسیروں کی رہائی کا سبب |
| لوگ رسموں سے بہت دیکھے بَری ہوتے ہوئے |
| اتنی آسان نہ تھی اس کی حمایت لیکن |
| ہو گئے لوگ کھڑے پھر بھی جری ہوتے ہوئے |
| پیڑ یہ پھولا پھلا پھیل گئیں شاخیں سب |
| روک پایا نہ کوئی ان کو ہری ہوتے ہوئے |
| پھر بھی کچھ لوگ ہیں محروم فقط ضد کر کے |
| دھوپ میں بیٹھے رہے چھاؤں گھنی ہوتے ہوئے |
| وہ جو منزل پہ پہنچ جانے کی خواہش رکھے |
| راستے جاتے ہیں سب اس کی گلی ہوتے ہوئے |
| مردِ میداں تھا شجاعت کا وہ پیکر ایسا |
| ہمّتیں اس نے بڑھائی ہیں قوی ہوتے ہوئے |
| ہے تصوّف کے مسائل سے شناسا طارق |
| بادہ خوار اور طرح کا ہے ولی ہوتے ہوئے |
معلومات