| اے تلخئی ایّام مَیں کچھ سوچ رہا ہوں |
| جینا ہؤا الزام مَیں کچھ سوچ رہا ہوں |
| کل تک تو بھرے شہر میں چرچا رہا جس کا |
| اب ہو گیا گمنام مَیں کچھ سوچ رہا ہوں |
| جس در پہ پدھاری ہیں وہ نا چیز کا گھر ہے |
| رُک جائیے مادام مَیں کچھ سوچ رہا ہوں |
| سنتا ہوں کسی دوست نے توقیر اچھالی |
| یہ سچ ہے کہ الزام مَیں کچھ سوچ رہا ہوں |
| ساقی میری جیب کئی دن سے ہے خالی |
| لا دُردِ تہہِ جام مَیں کچھ سوچ رہا ہوں |
| موسیقی میں گزری ہے تو کچھ زر کی کھنک میں |
| ناکام ہی ناکام مَیں کچھ سوچ رہا ہوں |
| لُٹتی رہی ہر گام پہ معصوم جوانی |
| بِکتی رہی ہر شام مَیں کچھ سوچ رہا ہوں |
| ہر دَیر میں مسجد میں کلیساؤں میں ڈھونڈا |
| ملتا ہے کہاں رام مَیں کچھ سوچ رہا ہوں |
| زلفوں کے تلے کالی گھٹاؤں کی جوانی |
| ہو جائے یہیں شام میَں کچھ سوچ رہا ہوں |
| قرآن کی دولت سے ہے ایماں کی حرارت |
| کیا خُوب ہے انعام مَیں کچھ سوچ رہا ہوں |
معلومات