| جاتے ہوئے نگاہ ملاتے چلے گئے |
| نشتر سا ایک دل پہ لگاتے چلے گئے |
| زلفِ سیاہ چاند سے مکھڑے پہ ڈال کر |
| وہ اضطرابِ قلب بڑھاتے چلے گئے |
| ہے اپنی زندگی کی کہانی یہ مختصر |
| خود روئے دوسروں کو ہنساتے چلے گئے |
| جس شخص نے گلے سے لگایا شبِ فراق |
| ہم اس کو حالِ زار سناتے چلے گئے |
| ہم دورِ ناگوار میں خوشیوں کے واسطے |
| ناکامیوں کا جشن مناتے چلے گئے |
| میں زخمِ دل سبھی کو دکھاتا رہا مگر |
| سب مجھ پہ مہرِ جرم لگاتے چلے گئے |
| تونے سبھی کے سامنے رسوا کیا ہمیں |
| ہم تیرے عیب سب سے چھپاتے چلے گئے |
| ہم میکدے میں بیٹھ کے فرقت کی رات کو |
| اک داستانِ وصل سناتے چلے گئے |
| احسنؔ قریب سے جو گزرتا چلا گیا |
| کچھ لوگ اپنے منہ کو چھپاتے چلے گئے |
معلومات