ہے جاں بہ لب ایک غم کا مارا شہِ مدینہ شہِ مدینہ

ہے جاں بَہ لب ایک غم کا مارا, شَہِ مَدینہؐ شَہِ مَدینہؐ

ہو جائے نَظّرِ کَرم خُدارا, شہِ مدینہؐ شہِ مدینہؐ

بہت سَتاتی ہے اُس کی فرقت, جو شہر ٹھہرا ہے رشکِ جنت

فِراق مِیں دل ہے پارہ پارہ, شَہِ مَدینہؐ شَہِ مَدینہؐ

حضورؐ مجھ کو سنبھالیے ناں, مِیں مر رَہا ہوں غمِ جَہاں سے

ہیں آپ ہی بس مِرا سَہارا, شَہِ مَدینہؐ شَہِ مَدینہؐ

حضورؐ مجھ پر ہو جائے رحمت, بَھلی ہو جائے مِری بھی قسمت

مَیں آپ پر جاں کَروں نِثارا, شَہِ مَدینہؐ شَہِ مَدینہؐ

تِرے سِوا کون لطف و رحمت, کَرے گا ہم پر شَفیعِ اُمتؐ

تِرے سِوا کون دے سَہارا, شَہِ مَدینہؐ شَہِ مَدینہؐ

تِرے سِوا اب کِسے کَہیں ہم, یہ اپنے احوالِ جانِ پُر غم

تِرے سِوا کون ہے ہَمارا شَہِ مَدینہؐ شَہِ مَدینہؐ

تِرے سِوا کس کو ہم دِکھائیں, یہ روح کے زخم, یہ خطائیں

ہے تُو ہی ہم بے کَسوں کا چارہ, شَہِ مَدینہؐ شَہِ مَدینہؐ

ہم اپنی جانوں پہ ظلم کر کے, کَہاں پہ جائیں شَہاؐ! کَہاں پے؟

تِرے سِوا کس کا ہے دَوارا, شَہِ مَدینہؐ شَہِ مَدینہؐ

تُمی سے تہذیب سیکھی سب نے, تُمی سے تعلیم پائی سب نے

تُمی نے عالم کو ہے سَنوارا, شَہِ مَدینہؐ شَہِ مَدینہؐ

تُمی نے سب کو دِیا سَلیقہ، تُمی نے سب کو شُعُور بخشا

تُمی نے بدلا نِظام سارا، شَہِ مَدینہؐ شَہِ مَدینہؐ

تُجھے مصیبت مِیں ہم پکاریں, تُجھے ہی مشکل مِیں دیں صَدائیں

سِوائے اِس کے نہیں گُزارا, شَہِ مدینہؐ شَہِ مدینہؐ

دِکھائیے اب حَسین چہرہ, کہ دم لَبوں پر ہے میرے آقاؐ

دُہائی دیتا ہے یُوں بِچارا, شَہِ مَدینہؐ شَہِ مَدینہؐ

بہ چشمِ نم التماس کرتا, ہے شاہدِؔ خستہ دست بستہ

دَمِ نَزع دیجیے نَظَارا, شَہِ مَدینہؐ شَہِ مَدینہؐ