| ہم کو یہاں خزاں سے گلہ ہے نہ پیار میں |
| ہم کو فراقِ یار کا ڈر ہے بہار میں |
| باتوں کو تیری مان لوں کیسے بتا دے جب |
| کچھ بھی ثبات ہے نہیں عہد و قرار میں |
| چپ ہیں یہاں جو تیرے ستم پر ہے یہ سبب |
| تیرا وہاں حساب ہے روزِ شمار میں |
| اعزاز کی غرض ہے تو گلشن سجا فقط |
| ملتا نہیں سکوں ہمیں پھولوں کے ہار میں |
| کرنا کبھی نہ دفن مرے دل کو میرے ساتھ |
| جینے نہ مجھ کو دیگا مرا دل مزار میں |
| ہم کو ستم عزیز ستم گر کو ہم عزیز |
| پھرتے ہیں ایک دوسرے کی رہگزار میں |
| بس اک نگاہ میں ہوا میرا حواس گم |
| یہ دل بھی قید ہو گیا مِژگانِ یار میں |
| حسانؔ چل تو اب کہ کسی اور جا بسے |
| سمجھا نہ کوئی تیری زباں اس دیار میں |
معلومات