| سجے ہیں دار صلیبوں پہ سرنہیں آیا |
| کسی کی روح میں اب تک بھنور نہیں آیا |
| پڑھا تھا ظلم کی حد پر ہے انقلاب کہیں |
| ہماری راکھ میں اب تک شرر نہیں آیا |
| سفرکٹھن تھا بہت پاؤں کھس گئے میرے |
| ہوئی ہے شام مگر میرا گھر نہیں آیا |
| پھنسا ہے قافلہ اب بھیڑیوں کے نرغے میں |
| ہے انتظار پر اب تک قمر نہیں آیا |
| جھکے ہوؤں کو یہاں خلعتیں صلے میں ملیں |
| میں چاہتا تھا مگر یہ ہنر نہیں آیا |
| صدا لگائی ہے پر بند ہیں دریچے سبھی |
| صدا میں میری ابھی وہ اثر نہیں آیا |
| وہ کہہ رہے ہیں کہ مہدی کا اب ظہور ہوا |
| میں ڈھونڈتا ہوں مگر وہ بشر نہیں آیا |
| ریاضتوں میں کمی رہ گئی کہیں شاہد |
| عمر گذر گئی لیکن ثمر نہیں آیا |
معلومات