| کِس زمانے کی بات کرتا ہے |
| لوٹ آنے کی بات کرتا ہے |
| وہ فلک پر کبھی گیا ہی نہ تھا |
| جس کے آنے کی بات کرتا ہے |
| جب سے راس آگیا قفس ہر شخص |
| آشیانے کی بات کرتا ہے |
| ہو گی مقصود پردہ پوشی مری |
| وہ گھر آنے کی بات کرتا ہے |
| غیر پرکھے تو خیر ، وہ بھی مگر |
| آزمانے کی بات کرتا ہے |
| کھو کے محبوب میرا ، وہ مجھ سے |
| بھول جانے کی بات کرتا ہے |
| کیا خُدا کی اُسے بتائیں وہ |
| بُت گِرانے کی بات کرتا ہے |
| ڈوب جاتا ہے میرا دِل اُس پل |
| جب وہ جانے کی بات کرتا ہے |
| چاند تارے زمین سورج بھی |
| اُس کے آنے کی بات کرتا ہے |
| حُسن وہ جس کے تم بھی شیدا ہو |
| پاس آنے کی بات کرتا ہے |
| مُردہ روحوں کو پھر سے قُم کہہ کر |
| وہ جِلانے کی بات کرتا ہے |
| گر تُو سمجھے تو آ یہیں بیٹھے |
| کِس خزانے کی بات کرتا ہے |
| اُس پہ طارق فدا ہوا جب سے |
| جاں لُٹانے کی بات کر تا ہے |
معلومات