| نفرتوں کا تہ و بالا کیجئے |
| آدمی کو عشق والا کیجئے |
| ترش چیزیں لے کے مت گھوما کریں |
| جیب میں میٹھا بھی ڈالا کیجئے |
| آنے والوں کا سفر آسان ہو |
| راہ ٹوٹی ہے سنبھالا کیجئے |
| سازِ غم کو نغمۂ شاداب دیں |
| رقصِ نومیدی کو ٹالا کیجئے |
| دوستی اچھی ہے کرکے دیکھئے |
| دشمنی کا منہ ہی کالا کیجئے |
| خلد کا موسم چمن میں کھل اٹھے |
| رشکِ شبنم داغِ لالا کیجئے |
| چاندنی شب بھر ملے شیدؔا تجھے |
| دھوپ کے ٹکڑوں کو پالا کیجئے |
| *علی شیدؔا* |
معلومات