| جب بھی لاہور سے ہجرت کا سوال آتا ہے |
| مجھکو رہ رہ کے فقط اسکا خیال آتا ہے |
| تیرے پہلو نے بچا رکھی ہے عزت میری |
| ورنہ خورشید پہ بھی وقتِ زوال آتا ہے |
| اس گھڑی بھر کی ملاقات کا خوش رنگ خیال |
| لے کے نغموں میں مرے رنگِ وصال آتا ہے |
| گل نکھر جاتے ہیں یونہی جو گزر جائے وہ |
| رنگ اپنا ہی گلابوں پہ وہ ڈال آتا ہے |
| مصر والوں کو بتانا ہے حسیں کا مطلب |
| اب سرِ بزم مرا زہرہ جمال آتا ہے |
| مانگتا جو بھی تھا بچپن میں مجھے ملتا تھا |
| تو نہیں ملتا تو مجھکو یہ خیال آتا ہے |
| اب دعا میں نہیں سجدے میں تجھے مانگتا ہوں |
| پھر کہیں جا کے عبادت میں کمال آتا ہے |
| دیکھ پھر سے وہ زلیخا کا جواں ہو جانا |
| کون کہتا ہے کہ عاشق پہ زوال آتا ہے |
معلومات