| شامیں ہیں میری سوگروار ہنوز |
| نہ ملا کوئی غم گسار ہنوز۔ |
| دمِ رخصت سے ہے مجھے درپیش |
| حادثہ چشمِ اشکبار ہنوز |
| رشتہ تعمیرِ بے اساس تھا وہ |
| نہ رہا تجھ پہ اختیار ہنوز |
| جانے کس پیش و پس کا ہے صلہ تُو |
| تجھ سے مل کے ہوں شرم سار ہنوز |
| رشتۂِ دل جو چند روز کا تھا |
| اس لیے سر ہے زیرِ بار ہنوز |
| تری دولت سے جاہ و حشمت ہے |
| اور میں غم سے ہوں مالدار ہنوز |
| تیغ بازی ہے مشغلہ تیرا |
| اور میں ہی بنا شکار ہنوز |
| چوم کر وہ ترا پیالۂِ ناف |
| نشے میں ہیں یہ بادہ خوار ہنوز |
| حسن، دولت کہ دونوں سے تاریخ |
| ہوتی آئی ہے تار تار ہنوز |
| اور تو کیا، بچھڑ کے ہے کوئی |
| زار، نادار، بے قرار ہنوز |
| بس طبیعت بہلنے کو، تری |
| ہے توجہ پہ انحصار ہنوز |
| تیرے جانے کے بعد تیری یاد |
| بن کے یاں اڑتی ہے غبار ہنوز |
| مٹ گیا رشتہ ہر کسی سے مگر |
| ہے اداسی سے برقرار ہنوز |
| زندگی چار دن کی بات تھی صرف |
| نہیں لیکن کچھ اختصار ہنوز |
| آرزو، تیری آرزو واللہ |
| زیبؔ کو کر رہی ہے خوار ہنوز |
معلومات