| دل میں اُتر کے درد کو راحت میں ڈال دے |
| مولا تو اپنے کرم سے ایسے خیال دے |
| ذکرِ خدا سے دل کی یہ کلی کھلی رہے |
| نفسِ اَماّرہ سے مرے آتش نکال دے |
| دنیا کے رنگ و بو سے رہوں دور میں سدا |
| صدقہ نبی کا اے خدا رزقِ حلال دے |
| کینہ، حسد، فریب سے دامن بچا رہے |
| اخلاق میں الہی تو مجھ کو کمال دے |
| ہر لمحہ یادِ حق میں ہی گزرا کرے مرا |
| دل کو الہی اپنا تو قرب و وصال دے |
| سچ کی صدا بلند ہو ہر ایک حال میں |
| باطل کے سامنے مجھے ہمت کمال دے |
| آئے گا زندگی کا مزہ پھر تجھے عتیق |
| اپنا وجود عشق کے سانچے میں ڈھال دے |
معلومات