| پیار کا اِک جہاں ہو نئے سال میں |
| ہر بشر شادماں ہو نئے سال میں |
| برکتیں، نعمتیں بھی برستی رہیں |
| ہر خوشی بیکراں ہو نئے سال میں |
| اِس وبائے کرونا کا ہو خاتمہ |
| زندگی پھر رواں ہو نئے سال میں |
| دشت کی چلچلاتی ہوئی دھوپ میں |
| اَمن کا سائباں ہو نئے سال میں |
| ہم سے تِشنہ لبوں کے لئے اے خدا! |
| کوئی دریا رواں ہو نئے سال میں |
| کوئی جگنو ہی اِس شہرِ ظلمات میں |
| منزلوں کا نشاں ہو نئے سال میں |
| یہ تعصب، کدورت بھی جاتی رہے |
| اور اَمن و اماں ہو نئے سال میں |
| ہم محبت سے تادیب کرتے چلیں |
| ایسی شیریں زباں ہو نئے سال میں |
| سب کو جاویدؔ غم سے رہائی ملے!! |
| وقت پھر مہرباں ہو نئے سال میں |
معلومات