| تکبّر چھوڑ دیتے ، عاجزی کی کچھ نمُو ہوتی |
| نہ یوں ناراض ہو جاتے ، اگر نرمی کی خُو ہوتی |
| تعصّب طاق پر رکھ کر اگر آتے وہ میداں میں |
| محبّت کی زباں میں کچھ ہماری گفتگو ہوتی |
| ہمیں کہتے تو ملنے کے لئے خود ہم چلے آتے |
| ہمیں بھی شوق تھا کچھ بات اُن سے رُو برو ہوتی |
| تجسّس نے ہمیں گھر سے نکالا سیر کرنے کو |
| کہاں ورنہ یہ دنیا دیکھنے کی آرزو ہوتی |
| تصّور میں تمہارے حسن کی تصویر جو بھی ہے |
| اُسے جب دیکھتے صورت وہی تو ، ہُو بہُو ہوتی |
| مہک ماحول میں پاکیزگی کی وہ نظر آئی |
| ہوا جاتے ہوئے اس کی گلی میں باوضو ہوتی |
| اگر معلوم ہوتا تم کو ، کتنا پیار کرتا ہے |
| تمہیں بھی اس کو پانے کی یقیناً آرزو ہوتی |
| تمہیں طارق خدا کو ڈھونڈنے کا شوق ہے ، سُن لو |
| وہ مل جاتا، اگر پانے کی سچی جستجو ہوتی |
معلومات