| نبی کا جشن مناتے ہیں جو عقیدت سے |
| خزانہ ملتا ہے ان کو خدا کی رحمت سے |
| جنھیں عزیز ہے میلادِ مصطفیٰ کی خوشی |
| انہی کے کام تو بن جاتے ہیں سہولت سے |
| درود و نعت وظیفہ ہے روز و شب جن کا |
| نوازتا ہے خدا ان کو خوب برکت سے |
| عیاں ہے بالیقیں فرمانِ کبریا سے یہی |
| خدا کی ہوگی اطاعت نبی کی طاعت سے |
| ذلیل و خوار ہوئے جارہے ہیں دنیا میں |
| کہ جب سے دور ہوئے ہیں نبی کی سنت سے |
| نبی کے نام کا میں نے خیال ہی باندھا |
| رہائی مل گئی فوراً تمام کلفت سے |
| بِلا طلب ہی دیا شاہِ دیں نے منگتوں کو |
| گدا بھی داتا بنے آپ کی سخاوت سے |
| ملی نجات کی کشتی بھی اور تارے بھی |
| لگائی لَو جو صحابہ سے اور عترت سے |
| سند ملے گی انھیں روزِ حشر بخشش کی |
| شغف ہے جن کو مشاہد نبی کی مدحت سے |
| عرض نمودہ : ڈاکٹر محمد حسین مشاہد رضوی |
معلومات