| فِراق میں جَل اُٹھا سینہ بھی جِگر کے سِوا |
| حضورؐ اب کوئی حسرت نَہیں نَظر کے سِوا |
| کَرم کی ایک نظر اب ہو یارسول اللہؐ |
| نظر کچھ آتا نہیں زیست میں خَطر کے سِوا |
| کریں حضورؐ اِسے آپ ہی کریں اچھا |
| نہیں ہے کچھ بھی مِری ذات میں کَسَر کے سِوا |
| بہ پیشِ سروَرِ عالمؐ, بہ پیشِ شاہِ اُممؐ |
| صَبا تُو اشک بھی پہنچا مِرے, خَبر کے سِوا |
| جو بغض, حیدرِ کرارؑ کا رکھیں دل مِیں |
| ٹھکانہ اُن کا نہیں حشر میں سَقر کے سِوا |
| خدا کی آنکھ سے دیکھو تو جان جاؤ گے |
| کچھ اور بھی ہیں مِرے مصطفیؐ بشر کے سِوا |
| جو دو جَہاں مِیں ہے مصداقِ آیہِ جَآءُوْك |
| اَمانِ جاں نہیں ملتی اُس ایک در کے سِوا |
| وسیلہ نامِ محمدؐ کا دے کے ہاتھ اُٹھا |
| تِری دعا نہیں دیکھے گی کچھ اَثر کے سِوا |
| چَلو کہ قاسمِ کنزِ خداؐ سے ہم مانگیں |
| وہ بھیک دیتے ہیں شاہؔد اَگر مَگر کے سِوا |
معلومات