| غزل |
| پُھول کے تذکرے، خَار کی داستاں |
| زندگانی ہے گُل زار کی داستاں |
| گُل حیا سے ہُوا شبنمی شبنمی |
| جب سُنی اَن کہی خار کی داستاں |
| وقت چُن چُن کے کردار دیتا گیا |
| لفظ بُنتے گئے پیار کی داستاں |
| میرے نغمے ترے حُسن کے تذکرے |
| سُرخ لب اور رُخسار کی داستاں |
| زندگی کو جیو، لطف جینے میں ہے |
| جیت کی ہے نہ یہ ہار کی داستاں |
| اے مغنی تِرے سُر میں سوزِ جگر |
| حُسنِ سنگیت دِلدار کی داستاں |
| اک مغنی کے فن کا یہ اعجاز ہے |
| ایک سُر میں ہے ہر تار کی داستاں |
| رُوح سرشار ہو تی ہے سُن کے یہ دُھن |
| اِس میں پنہاں ہے دل تار کی داستاں |
| سب وسائل پہ قابض ہیں کچھ خانداں |
| بُھوک و اِفلاس سَنسار کی داستاں |
| جتنے تکرار و اصرار سے وہ کہیں |
| اُس قدر جھوٹ سرکار کی داستاں |
| ایک کلمہء توحید میں ہے بیاں |
| میرے اِنکار و اِقرار کی داستاں |
| ہم نہ ہوں گے مگر تم کو یاد آئے گی |
| حُسنِ اِخلاص و اِیثار کی داستاں |
| خُوب بِکتیں شہاب آپ کی کاپیاں |
| آپ لِکھتے جو بازار کی داستاں |
| شہاب احمد |
| ۲۳ اکتوبر ۲۰۲۲ |
معلومات