| ریت کی دیوار تھا مَیں گِر گیا تو کیا ہؤا |
| بے وفا کی دوستی میں باوفا رُسوا ہؤا |
| چھوڑ کر رستے میں مجھ کو ناخُدا کہنے لگا |
| ڈھونڈھ لینا راہ میں تِنکا کوئی بہتا ہؤا |
| وہ لڑکپن کی بہاریں مستیاں شور و شغب |
| کس طرح بھولے گا دل سے دَور وہ گزرا ہؤا |
| دیکھ کر قبروں کے کتبے کانپ اُٹھے جسم و جاں |
| یاد ہے مجھ کو یہاں اک شہر تھا بستا ہؤا |
| کب ڈھلے گی شامِ غم چمکے گا کب مہرِ منیر |
| پوچھتا ہے ہر نفس افلاس کا مارا ہؤا |
| رو رہے ہو کس لئے اک دن تو جانا ہے مجھے |
| کیا کرے گا جی کے اک تقدیر کا مارا ہؤا |
| ریزہ ریزہ کر دیا جس نے مرے خوابوں کا گھر |
| پھر رہا ہے آج خود بھی ٹھوکریں کھاتا ہؤا |
| شر میں بھی اک خیر کا پہلو رہا غالب امید |
| دوستوں کی دوستی کا ڈھونگ تو افشا ہؤا |
معلومات