| ایبٹ آباد |
| ایبٹ آباد مرے شہر تو آباد رہے |
| دل تری یاد میں اکثر یونہی برباد رہے |
| تُو مرے شہر سدا شاد ہو آباد رہے |
| تُو مجھے پہلی محبت کی طرح یاد رہے |
| تری وادی کے مناظر ہیں زمانے سے جدا |
| ترے موسم کسی نُو خیز حسینہ کی ادأ |
| تِرے دریا کی روانی پہ مری جان فدا |
| ترے جھرنوں میں ہے پائل کی صدا یاد رہے |
| تُو مجھے پہلی محبت کی طرح یاد رہے |
| تِرے کوچے وہ محلے تِرے بازار حسیں |
| گیسؤِ اَبر میں چھپتے ترے کہسار حسیں |
| تو کہ تہذیب و تمدن کا ہے شہکار حسیں |
| تو رہے چشمِ تصور میں تو دل شاد رہے |
| تُو مجھے پہلی محبت کی طرح یاد رہے |
| مرے محبوب کے آنے کی بشارت جو کرے |
| بُوۓ جاناں کو چُرانے کی شرارت جو کرے |
| اسکے رخسار پہ بوسے کی جسارت جو کرے |
| تری خوشبو سے لدی باد صبا یاد رہے |
| تُو مجھے پہلی محبت کی طرح یاد رہے |
| شہاب احمد |
| ۱۲ مئی ۲۰۱۵ |
معلومات