| یک لحظۂ وصال سے گزرا ہوا وجود |
| اب تک غریقِ خواب ہے جاگا ہوا وجود |
| پہلے کھنکتی خاک سے پیدا کیا گیا |
| پھر جا کے اس زمین پہ برپا ہوا وجود |
| آتے ہو لوٹ جاتے ہو اس شہرِ قلب سے |
| گویا کہ آنے جانے کا رستہ ہوا وجود |
| پھر یوں ہوا کہ آنکھ سے اوجھل سا ہو گیا |
| اشکوں سے میری آنکھ میں گُھلتا ہوا وجود |
| گنتا ہے روز تیرے ستارے سرِ زمین |
| آکاش تیری گود سے اترا ہوا وجود |
| ہوتا ہے روز نیند کی وادی میں جا غروب |
| سورج کی طرح شام کو ڈھلتا ہوا وجود |
| اے چشمِ نم تو قلب کا کچھ تو خیال کر |
| دریا ترے کنارے پہ صحرا ہوا وجود |
| لو آج گر چکا ہے کٹے پیڑ کی طرح |
| ہر لمحہ انتظار میں جھکتا ہوا وجود |
| کیوں پڑ رہی ہیں کان میں آوازیں بین سی |
| کیوں سامنے پڑا ہے یہ ادھڑا ہوا وجود |
معلومات