| تیغ و تبر کو چھوڑ کر ہم نے قلم پکڑ لیا |
| دینِ خدائے مصطفٰے کا جو علَم پکڑ لیا |
| نورکے پیچھے چل پڑے بھٹکیں گے کیسے ڈر نہیں |
| اس کے ہی پیروکار تھے اس کا قدم پکڑ لیا |
| دوش نہ دو کہ عشق میں شاہِ عرب پہ ہم فدا |
| اس کی وفا میں دامنِ شیخِ عجم پکڑ لیا |
| عشقِ بتاں ترَک کئے اُس نے صلیب توڑ دی |
| دیر و کلیسا او حرم میں سے حرم پکڑ لیا |
| حسنِ ازل ہے جاوداں بت کدے سارے عارضی |
| اس کو ذرا بتاؤ تو جس نے صنم پکڑ لیا |
| دیکھا ہے رشک سے اسے جس نے بھی جان وار دی |
| ہوکے شہید جس نے بھی باغِ ارَم پکڑ لیا |
| ظلم سکھا رہے تھے جو ان سے رہی مغائرت |
| جس نے سکھایا پیار پھر وہ ہی دھرم پکڑ لیا |
| باہمی اختلاف نے فرقے بنا دیے کئی |
| کرنے تھے جس نے فیصلے اس کو حَکَم پکڑ لیا |
| ہم کو خدا کے فضل نے خود یہ دکھایا راستہ |
| ہم نے فروع چھوڑ کر نقطہ اہم پکڑ لیا |
| ہاتھ جو اس کے ہاتھ میں طارقِ خستہ نے دیا |
| عجز کی راہ پر چلا جاہ و حشم پکڑ لیا |
معلومات