تم خدا کی قسم نور ہی نور ہو کلامِ عتیق

یا حبیبِ خدا اشرف الانبیاء تم خدا کی قسم نور ہی نور ہو

کوئی تم سا نہیں اے شہِ دُو سَرَا تم خدا کی قسم نور ہی نور ہو

لفظ خاموش ہیں علم عاجز یہاں اور ہمت نہیں ہے قلم میں کوئی

کیسے لکھ پائے کوئی تمہاری ثنا تم خدا کی قسم نور ہی نور ہو

آپ سے ہے جہاں میں بہاروں کا رنگ آپ کے دم سے روشن ہیں کون و مکاں

آپ جیسا نہیں ہے کوئی باخدا تم خدا کی قسم نور ہی نور ہو

آپ کی ذات ہے وجہ تخلیق کل سب جہانوں کی رحمت بھی تو آپ ہیں

عرش سے فرش تک ہے یہی اک صدا تم خدا کی قسم نور ہی نور ہو

چاند سورج ستاروں کی یہ روشنی آپ کے نور کی ہی یہ خیرات ہے

اہل ایمان کا ہے یہی فیصلہ تم خدا کی قسم نور ہی نور ہو

ان کا ارشاد سچ ان کی ہر بات سچ اے عتیق ان کا پیغام ہے دین حق

میرا ایمان بھی ہے یہی برملا تم خدا کی قسم نور ہی نور ہو