| آسماں تک رسد نہیں ہوتی |
| عرض کی جب رَوَد نہیں ہوتی |
| عشق کی صبر آزمائش ہے |
| ضبط کی کوئی حد نہیں ہوتی |
| پاؤں چھُوتی ہے بچھ کے قدموں میں |
| گھاس گو سرو قد نہیں ہوتی |
| جب بھروسہ ہو اپنی طاقت پر |
| پھر خدا کی مدد نہیں ہوتی |
| باعثِ دشمنی ، جہالت ہے |
| ورنہ فطرت تو بد نہیں ہوتی |
| وہ جو کرتے نہیں سوال کبھی |
| کیا ضرورت اشدّ نہیں ہوتی |
| ہو نہ آزاد فیصلوں میں جو |
| بات اس کی سند نہیں ہوتی |
| آنکھ جب تک نہ کھول دی جائے |
| روشنی تا ابد نہیں ہوتی |
| عشق ہی کودتا ہے آتش میں |
| اس کی قائل خِرَد نہیں ہوتی |
| شرط ہے دل سے نکلی ہو طارقؔ |
| وہ دُعا پھر تو رد نہیں ہوتی |
معلومات