| اے سیدہ پاکؑ کے دُلارو، تمہیں ہمارا سلام ہر دم |
| کتابِ لاریب کے سپارو، تمہیں ہمارا سلام ہر دم |
| امامِ بَر حقؑ کے جاں نثارو، تمہیں ہمارا سلام ہر دم |
| محمدی دیں کے سازگارو، تمہیں ہمارا سلام ہر دم |
| اے ملکِ صبرو رضا کے شاہو، اے زُمرہِ فقر کے اِمامو |
| اے کشورِ حق کے تاجدارو، تمہیں ہمارا سلام ہر دم |
| یہ باغ دینِ خدا تعالی تمہارے خوں کی مہک سے مہکا |
| جنابِ زہرا کے گُل عذارو تمہیں ہمارا سلام ہر دم |
| جنابِ عباس و حضرتِ حُر شَبِیہِ احمد حبیب و جعفر |
| حُسینی لشکر کے شہسوارو، تمہیں ہمارا سلام ہر دم |
| کوئی جو قصہ تمہارا کہہ دے کلیجہ ہو جائے ٹکڑے ٹکڑے |
| اے کربلا والو دل فگارو تمہیں ہمارا سلام ہر دم |
| حکومتیں بھی نوازتے ہو سعادتیں بھی نوازتے ہو |
| علی کے بیٹو عطا شعارو تمہیں ہمارا سلام ہر دم |
| حسینؑ سے کی جنہوں نے بیعت طلب سبھی پر ہماری لعنت |
| حُسینؑ کے سب طلب گزارو، تمہیں ہمارا سلام ہر دم |
| اے کوچہِ حضرتِ محمد کوئے نجف ریگ زارِ کربل |
| زمین پر چند خُلد زارو تمہیں ہمارا سلام ہر دم |
| بہ صورتِ عجز کہتے ہیں شاہدؔ اور احبابِ کربلائی |
| خدائی رازوں کے رازدارو، تمہیں ہمارا سلام ہر دم |
معلومات