| غزل |
| ٹھیک سمجھے ہو، سچ کہا، بولو |
| پیٹھ پیچھے نہ تم برا بولو |
| آپ دیرینہ یار ہو میرے |
| مَن میں جو بھی ہے برَملا بولو |
| لوگ اخلاص کے نہیں قائل |
| رنج کی بات ہے بجا بولو |
| طول دیتے ہو بات کو ناحق |
| چند لفظوں میں مدعا بولو |
| جھوٹ سچ میں تمیز مشکل ہے |
| خُوب تحقیق کر لیا، بولو |
| بے وفائی اگرچہ ثابت ہو |
| پھر جو چاہو، ہمیں سزا بولو |
| ساتھ چلنا ہے تو بھروسہ کر |
| یا کریں راستے جُدا بولو |
| جھوٹ سچ میں موازنہ کیسا |
| تُم کُجا اور ہَم کُجا بولو |
| عَرض بولی تو اَن سُنی کر دی |
| پھر مخاطب ہوئے، کہا، بولو |
| فیض تم سے ہمیں نہیں نہ سہی |
| آشنا کو تو آشنا بولو |
| دوستوں کو نہیں ہے پاسِ وَفا |
| دشمنوں سے کروں گِلا بولو |
| خُوب اُگلا زہر شہاب احمد |
| جَب کبھی پیار سے کہا، بولو |
| شہاب احمد |
| ۱۹ اکتوبر ۲۰۲۳ |
معلومات