| پرتوِ نورِ خدا احمدِ مختار کی نعت |
| مالکِ کون و مکاں سیدِ ابرار کی نعت |
| نعمتِ ربِ جہاں رحمتِ غفار کی نعت |
| نوشۂ بزم جناں نبیوں کے سردار کی نعت |
| درِ اقدس پہ جبیں سائی کریں گے اک روز |
| اور رو رو کے پڑھے جائیں گے سرکار کی نعت |
| رونقِ بزمِ جہاں نعت کے بن بے معنی |
| رونقِ بزمِ جہاں مطلعِ انوار کی نعت |
| ہر گھڑی لب پہ ہو یا رب شہِ کونین کا ذکر |
| بربطِ دل پہ بجے واقفِ اسرار کی نعت |
| سر ہے وہ سر جو فدا ان کے قدم پر ہو جائے |
| دل ہے وہ دل کہ جہاں بستی ہو سرکار کی نعت |
| وائے ناکامیِ دارین کہ لب کھل نہ سکے |
| نجدیا کیسے پڑھے حضرتِ دلدار کی نعت |
| سر بسر رحمتِ عالم پہ فدا ہو جانا |
| دین و ایماں ہے یہی اور یہی سرکار کی نعت |
| ابرو ہیں قوسِ قزح، زلفِ مبارک واللیل |
| اور جہاں سارا ہے ان کے لب و رخسار کی نعت |
| لائقِ مدحِ پیمبر تھی کہاں میری زباں |
| فضلِ رحمان ہوا کہہ گیا سرکار کی نعت |
| ہم سخن کوئی بنے یا نہ بنے حضرتِ دل |
| ہم کو کرنی ہے بیاں سرور و سردار کی نعت |
| جشنِ میلادِ نبی حشر تلک ہوگا یوں ہی |
| اور اس دن بھی پڑھیں گے شہِ ابرار کی نعت |
| شعلۂ عشقِ نبی دل میں کریں گے روشن |
| یوں ہی پڑھ پڑھ کے شہِ دیں گلِ گلزار کی نعت |
| نعتِ سرکارِ دو عالم ہے وتیرہ اپنا |
| مقصدِ زیست ہے اس مالک و مختار کی نعت |
| و الضحٰی چہرۂ پر نور، ہیں آنکھیں ما زاغ |
| پورا قرآن ہے کونین کے سردار کی نعت |
| لطف کیسا ہے عجب ان کی ثنا خوانی میں |
| قدسیاں پڑھتے ہیں ہر دم مرے سرکار کی نعت |
| اپنے بیگانے کی پہچان اگر ہو مقصود |
| رضَوی رنگ میں پڑھنے لگو سرکار کی نعت |
| دہر کے حسنِ یگانہ اے حبیبِ داور |
| ہو قبول اشکوں سے پر نجمیؔ گنہگار کی نعت |
| تھام کر ہاتھ مرا کہتی ہے بادِ طیبہ |
| نجمی! آ پڑھتے ہیں اس ہستیِ ضو بار کی نعت |
معلومات