| بخت کا میرے ستارہ روشنی میں آ گیا |
| بے دھڑک اک ماہ پارہ روشنی میں آ گیا |
| فائدے کی دھند آنکھوں سے ہماری چھٹ گئی |
| آخرش سارا خسارہ روشنی میں آ گیا |
| دہر کی تاریکیوں میں اب تلک ڈھونڈا جسے |
| وہ نظر مجھ کو نظارہ روشنی میں آ گیا |
| سونے والا تھا کوئی دریا اندھیرا اوڑھ کر |
| ایک دم اس کا کنارہ روشنی میں آ گیا |
| اپنی وقعت جان جائے گا بہت جلدی اگر |
| آگ سے روٹھا شرارہ روشنی میں آ گیا |
| وقت کی تاریکیوں میں کھو چکا عنوانِ زیست |
| کس طرح آخر دوبارہ روشنی میں آ گیا |
| روشنی میں خال و خد چھپ جاتے ہیں لیکن قمرؔ |
| جب ہوا اس کا اشارہ روشنی میں آ گیا |
| قمرآسیؔ |
معلومات