| کل گزری مری نظروں سے تحریر کسی کی |
| پھر گھوم گئی آنکھوں میں تصویر کسی کی |
| وا کر گئی ہے مجھ پہ وہ ماضی کے دریچے |
| شانوں پہ گری زلفِ گرہ گیر کسی کی |
| وہ خواب جو آنکھوں نے مری برسوں ہیں دیکھے |
| وہ خواب تو میرے ہیں ، ہے تعبیر کسی کی |
| مجھ پر ہے مرے یار کی نظروں کی عنایت |
| جو زخم نہ دے پائی ہے شمشیر کسی کی |
| تالا جو مرے دل پہ لگا ہے، ہے کسی کا |
| پیروں میں پڑی ہے مرے زنجیر کسی کی |
| میرے تو کسی کام نہیں آئی مبشّر |
| تدبیر بدل دیتی ہے تقدیر کسی کی |
معلومات