| غزل |
| چوڑیوں کا چھن چھنا چھن بولنا اچھا لگا |
| دست و بازو پر سجا رنگِ حنا اچھا لگا |
| برق چمکی اور سمٹ کر ایک قالب ہو گئے |
| چاہتوں کی بارشوں میں بھیگنا اچھا لگا |
| بعد بارش وہ ٹھٹھرنے کا بہانہ خوب تھا |
| ایک کمبل میں سمٹ کر بیٹھنا اچھا لگا |
| خلوتِ جاناں میں آتے گل ہوئے شرم و حیا |
| پنکھڑی سے لب کھلے تو چومنا اچھا لگا |
| وائے رے قسمت کہ ساقی مہرباں ہم پر ہوا |
| مد بھری آنکھوں سے پینا جھومنا اچھا لگا |
| اپنی دانش میں غضب تیراک تھے ہم بھی مگر |
| ہنستی آنکھوں کے بھنور میں ڈوبنا اچھا لگا |
| پہلے نخرے سے نظر انداز کر دینا ترا |
| پھر جھروکے سے پلٹ کر جھانکنا اچھا لگا |
| محوِ زیبائش ہو تم اور محو حیرت آئینے |
| آئینوں کو بھی تمھارا سامنا اچھا لگا |
| گرچہ سینہ چیرتا ہے وہ جدائی کا سماں |
| وقتِ رخصت پھر پلٹ کر دیکھنا اچھا لگا |
| حکم جب کیجئے شہاب احمد ہمہ تن گوش ہے |
| آپ نے جو بھی کہا ۔ جو کچھ سنا ۔ اچھا لگا |
| شہاب احمد |
| ۲۹ اگست ۲۰۱۷ |
معلومات