| ریختہ سہل نہیں آپ نے ارشاد کیا |
| ہم نے پھر میر تقی میرؔ کو استاد کیا |
| ”یوں تو دس گز کی زباں“ میرؔ بھی رکھتے تھے مگر |
| ”بات کو طول نہیں دیتے“ ہم، آزاد کیا |
| ”سینہ ہے چاک، جگر پارہ ہے، دل سب خوں ہے“ |
| مصرعِ میرؔ نے آزردہ و ناشاد کیا |
| ”بس بہت وقت کیا شعر کے فن میں ضائع“ |
| میرؔ! دل ”ترکِ خیالات“ میں فولاد کیا |
| ”شور ہے پیر و جواں میں“ اب اسی لڑکے کا |
| آپ نے تھا جسے اے میرؔ! ”پری زاد“ کیا |
| ”بد زباں“ میرؔ کو جو ”گالیاں دے ہے“ کمبخت |
| ”سنتے ہو“ اس نے وقار اپنا ہی برباد کیا |
| ”متّصل ہو سکے تو ہم سے ملاقات کرو“ |
| میرؔ! ہم نے تجھے پڑھ پڑھ کے بہت یاد کیا |
| ”مجھ سے دو اور گڑیں“ میرؔ کا فرمان جو تھا |
| قیس و تنہاؔ ہی نے پھر ”دشت“ کو ”آباد“ کیا |
| ”بعد یک عمر کہیں تم کو جو تنہا پایا“ |
| ”ڈرتے ڈرتے ہی“ تجھے میرؔ کا نقّاد کیا |
معلومات