| یہ مانا وہ دیر و حرم تو نہیں تھے |
| مقدّس عرب یا عجم تو نہیں تھے |
| مقدّر سے ماں باپ ملتے ہیں سب کو |
| کہ بس میں ہمارے ، جنم تو نہیں تھے |
| یقیناً ہے قدموں تلے ماں کے جنّت |
| پہ والد بھی جنّت سے کم تو نہیں تھے |
| مرے سر پہ تھے سائباں کی طرح وہ |
| کڑی دھوپ کے یوں ستم تو نہیں تھے |
| وہ مایوسیوں میں رہے اک سہارا |
| کسی اور کے یہ کرم تو نہیں تھے |
| مرے راستے پر نظر ایسے رکھتے |
| کہیں میرے بھٹکے قدم تو نہیں تھے |
| مرے قہقہوں پر نظر ان کی ہوتی |
| کہیں آنسؤں سے وہ نم تو نہیں تھے |
| انہیں تو ہمیشہ یہی فکر رہتی |
| چھُپے میری خوشیوں میں غم تو نہیں تھے |
| بڑے غور سے میرے خط کو وہ پڑھتے |
| کہیں ان پہ شکوے رقم تو نہیں تھے |
| انہیں دیکھ کر پھوٹتیں دل سے خوشیاں |
| یونہی ہنس کے رکھتے بھرم تو نہیں تھے |
| وہ ہو جائیں گے ہم سے اک روز رخصت |
| یوں خدشے بھی لیتے جنم تو نہیں تھے |
| وہ دن تھے کہ پڑھنے کو ملتا ہمیں سچ |
| کہ آسان بکتے قلم تو نہیں تھے |
| وہ اچھے زمانے تھے ، ہاتھوں میں طارقؔ |
| تھے پیالے ، کہیں جامِ جم تو نہیں تھے |
معلومات