| اے نازشِ محبت ! خوش شکل خوبرو |
| جس کے نگاہ و دل کے چرچے ہیں چارسو |
| مجنوں تری حقیقت بن جاۓ نہ فسانہ |
| پھرتا ہے جابجا کیوں رہتا ہے جو بجو |
| کہتا ہے اک خردمند اے سرفروشِ دیں |
| بزدل صفت جواں ہی ہوتے ہیں صلحجو |
| ترتیبِ ساز و ساماں ہو نظم و بندوبست |
| ہے ناگزیر جب کہ باطل سے دوبدو |
| وہ کیوں نہ مے کدے کی تعمیرِ نو کرے |
| ہونا ہے جس کو اک دن ساقی کے روبرو |
| ملت کے جانثاروں کو ڈھونڈھتا ہوں میں |
| بیتاب کررہی ہے مجھ کو یہ جستجو |
| یہ فکر کر رہی ہے آتش بجاں مجھے |
| کیسے بچاؤں دینِ محمؐد کی آبرو |
| ناکام ہوں اگرچہ مایوس تو نہیں |
| ہر لمحہ ہر گھڑی ہوں میں محوِ جستجو |
| وہ شمع پھر جلا دے محفل میں ساقیا |
| پروانے مضطرب ہیں پھر گردِ آرزو |
| صدقے میں اُن کے یارب ! اِن کو تو جاوداں کر |
| واجب ہے نام لینا جن کا کہ باوضو |
| مردہ دلوں کو روحِ حیوانی بخش دے |
| موجِ نفس بھی یکسر ہوجائے سرخرو |
| تازہ دلوں میں پیدا فکرِ کہن کرے |
| شاید کہ شاہؔی تیرا اندازِ گفتگو |
معلومات