رخِ خنداں گھنی زلفِ پریشاں کون دیکھے گا
سوا میرے یہاں پر کفر ساماں کون دیکھے گا
جمالِ گلشن و رنگِ بہاراں کون دیکھے گا
ترے ہوتے کسی کو جانِ جاناں کون دیکھے گا
ترا چہرہ کہیں بڑھ کر ہے روشن چاند سے جاناں
ترے پہلو میں آ کر ماہِ تاباں کون دیکھے گا
تمہارے پاس آئیں گے پریشاں لوگ محشر میں
نہ دیکھے تُو نے تو پھر ایسے انساں کون دیکھے گا
یہاں پیرِ مغاں کی آنکھ سے ملتی ہے مے سب کو
یہ میخانہ ہے یاں کافر مسلماں کون دیکھے گا
چمن میں دن زرا آ لینے دو فصلِ بہاراں کے
مرے دل پھر یہ تیرے عہد و پیماں کون دیکھے گا
نہ بیدل ہے نہ بیدم ہے نہ کوئی ہے نصیر الدین
مرا اب درد پیہم سوزِ پنہاں کون دیکھے گا
اگر تم نے بھی اس دنیا کی طرح پھیر لیں آنکھیں
مرے عیسی مرا دردِ دل و جاں کون دیکھے گا
مرے غم ہائے خانہ میں اگر تم بھی نہ آئے تو
تڑپتا مبتلائے شامِ ہجراں کون دیکھے گا
ہمیں ہے واسطہ شاہدؔ کسی زلفِ پریشاں سے
زمانے میں کوئی ہم سا پریشاں کون دیکھے گا

0
76