غَمِ دُنیا، غَمِ عُقبٰی، غَمِ ہستی مٹا دوں گا

غَمِ دُنیا، غَمِ عُقبٰی، غَمِ ہستی مِٹا دوں گا

غَمِ جاناں ہی کافی ہے، اِسی میں جاں لُٹا دوں گا

یہ تیرا غم فقیروں کو حَسیں یادوں میں رکھتا ہے

مِلے مُجھ کو یہی غم تو، غَمِ دوراں بُھلا دوں گا

ہمارے درمِیاں حائل، خُودی کا ایک پردہ ہے

اگر تُم پاس آجاؤ، خُودی کو میں جَلا دوں گا

کَمی کیا ہے مُحبت کی، مِرے دامن میں آجاؤ

اگر دامن یہ کم ہے تو فصیلِ دل گِرا دوں گا

تَمنّا دیدِ جاناں کی لے آئی ہے صَنم خانے

کِسی بُت میں نظر آیا، وہیں سَر کو جُھکا دوں گا

مِرا جینا، مِرا مَرنا، رَضا تیری، قَضا تیری

کَہوں خُود کو کہ میں بھی ہوں، میں خُود کو ہی دَغا دوں گا

اگر آئے مِرے دَم میں تمہارا دَم مِرے دِلبر

تِرے دَم سے بَقا لُوں گا، تِرے دَم کو وَفا دوں گا

تِرا چہرہ، مِرا چہرہ، مِری آنکھیں، تِری آنکھیں

مِری صورت، تِرا نقشہ، یہی نقشہ دِکھا دوں گا