| تازہ غزل ہوں نشرِ مکرّر نہیں ہوں میں |
| بگڑا ہوا کسی کا مقدّر نہیں ہوں میں |
| ہر دل عزیز ہوں سبھی ہیں جانتے مجھے |
| نازک سا آئنہ ہوں کہ پتھر نہیں ہوں میں |
| میرا گزر چمن سے تعلّق گلوں سے ہے |
| کہتا ہے کون بادِ معطّر نہیں ہوں میں |
| دامن میں ہیر رانجھے ہیں لیلٰی کا بھی ہے ذکر |
| کھو دے جو عقل پی کے مُخَمّر نہیں ہوں میں |
| ہوتا ہے ذکر حسن کا قصّے بھی عشق کے |
| محدود حسن و عشق کے اندر نہیں ہوں میں |
| کرتے ہیں جب احاطہ مضامین مختلف |
| محدود ہوں تو اتنی مغیّر نہیں ہوں میں |
| آزاد شاعری کے میں ہتھّے نہیں چڑھی |
| گو حوصلہ ہے اتنی مخیّر نہیں ہوں میں |
| اپنایا شاعروں نے مجھے حمد و نعت میں |
| ہے عاجزی زباں پہ مکبّر نہیں ہوں میں |
| طارق اگرچہ ذکرِ غزالاں ہے چاشنی |
| کوئی سمجھ نہ لے کہ مطہّر نہیں ہوں میں |
معلومات