مظہر مِرے نبیؐ ہیں، نُورِ قدیم کے
محشر میں ہوں گے چرچے ، میرے کریمؐ کے
جنت پڑی ہوئی ہے، قدموں میں آپؐ کے
پھیلے ہیں باغ گھر تک، خُلدِ نعیم کے
افضل ہیں کُل جہاں سے، اَخلاقِ مصطفٰیؐ
قرآں میں تذکرے ہیں، خُلقِ عظیم کے
اُمّی مِرے نبیؐ ہیں، عالم مِرے نبیؐ
مخزن مِرے نبیؐ ہیں، علمِ علیم کے
وارث علیؑ ولی ہیں، رَمزِ حریم کے
مولا علیؑ ہی جانیں، اَسرار میم کے
پتھر بھی چومتے تھے، پائے رسولؐ کو
وہ بھی تھے نام لیوا، دُرِّ یتیمؐ کے
پڑھا کرو دَرود یہ وردِ رحیم ہے
بُجھتے ہیں اِس سے شُعلے، نارِ جحیم کے
اک بار میرے دل کو، آقاؐ جو دیکھ لیں
مِٹ جائیں داغ سارے، دل سے اَثیم کے
دشمن ہُوا زمانہ، بے کس غُلام کا
رکھ لینا لاج اِس کی، صدقے تمیمؓ کے

0
14