| حالِ دلِ تباہ سے وہ بے خبر نہ تھا |
| منظور جس کو ہونا مرا چارہ گر نہ تھا |
| لرزاں رہے ہیں بام و درِ عرش دیر تک |
| گریہ اسیرِ ہجر ترا بے اثر نہ تھا |
| حیراں ہوں کیسے ڈوب گئی کشتی اس جگہ |
| دریا میں جس مقام پہ کوئی بھنور نہ تھا |
| کافی ہے رزق حسبِ ضرورت ملا ہمیں |
| قسمت میں خواہشات کا اپنی ثمر نہ تھا |
| آثارِ شہرِ دل سے عیاں ہے ہر آنکھ پر |
| پہلے یہ شہرِ امن تھا ، وحشت نگر نہ تھا |
| بھٹکے ہوئے یقین کریں بھی تو کس طرح |
| رہزن کے ساتھ رہنما شیر و شکر نہ تھا |
| کانٹوں سے اٹ چکا ہے ، بلاؤں سے بھر چکا |
| وہ راستہ جو تیری کبھی رہ گزر نہ تھا |
| جاتے ہوئے پرندے نے کیا کہہ دیا اسے |
| اتنا اداس پہلے کبھی بھی شجر نہ تھا |
| کچھ اس لیے کیے گئے تبلیغ پیار کی |
| اس کے علاوہ پاس ہمارے ہنر نہ تھا |
| جس کو جواہرات میں تولا گیا قمرؔ |
| پتھر تھا اپنی اصل میں کوئی گہر نہ تھا |
| قمرآسیؔ |
معلومات