| پھر دیے جلتے روشنی ہوتی |
| آنکھ خوشیوں سے شبنمی ہوتی |
| تیری خوشبو جو لاتی بادِ صبا |
| دور یک لخت برہمی ہوتی |
| کاش تم اک جھلک ہی دکھلاتے |
| شدتِ غم میں کچھ کمی ہوتی |
| چاند شرما کے دیکھتا تم کو |
| میرے آنگن میں چاندنی ہوتی |
| معجزہ یوں بھی دیکھتی دنیا |
| رات کچھ دیر کو تھمی ہوتی |
| دل میں گر خواہشیں نہ گھر کرتیں |
| زندگی خود سنور گئی ہوتی |
| عذر سب در کنار کر کے اگر |
| "تم جو آتے بڑی خوشی ہوتی" |
| راہ میں کھلتے بے شمار کنول |
| اور معطر گلی گلی ہوتی |
معلومات