| صبحِ ہنگام ہوتی ہے بیدار |
| ختم ہوتی ہے جستجوئے یار |
| اِک تمہاری نگاہِ اُلفت سے |
| ہوے بیکار، رنج و غم، آزار |
| دامنِ رحمتِ خدا میں ہے |
| جو کرے ہے گناہ کا اقرار |
| راز کُھلنے کا اِس میں خدشہ ہے |
| یوں نہیں ناچتے سرِ بازار |
| وہ چلے آتے ہیں عیادت کو |
| از پئے چین ہے مجھے آزار |
| ابھی دنیا سنبھل نہ پائے گی |
| ابھی برہم ہیں تارِ زلفِ یار |
| آپ کا جانا, موت کا آنا |
| اِک یہی تو ہے لمحہِ دشوار |
| وہ اگر کرتے وعدہِ پُرسش |
| ہر نئے روز ہوتے ہم بیمار |
| ہم کو معلوم ہیں تمہارے فریب |
| او دَغا باز، او نگاہِ یار |
| مجھے کچھ غم نہیں شبِ غم کا |
| ہے مِرے پاس ساغرِ سرشار |
| رونقِ شب کچھ ایسے بڑھتی ہے |
| پاس کچھ مے ہو اور کچھ مے خوار |
| ہو گئی رات گھر چَلو شاہدؔ |
| راہ تکتے ہوں گے دَر و دیوار |
معلومات