| جنوں کو چھوڑو ،خرد کا نہ اعتبار کرو |
| خدا نے رکھّا جبلّت میں ہے کہ پیار کرو |
| ہمیں شکایتِ دنیا سے کچھ نہیں مطلب |
| تمہیں گِلہ ہے اگر ہم سے بار بار کرو |
| ہماری گفتگو گزری اگر گراں تم کو |
| اِدھر نگاہ اُٹھا کر ، نظر تو چار کرو |
| تمہارے روٹھنے سے خوش تو بس عدو ہو گا |
| تم اُس کے سامنے ہم کو نہ سوگوار کرو |
| تمہیں جو دیکھ نہ پائے ہمارا کیا ہو گا |
| یہ روز ہم سے جو کہتے ہو انتظار کرو |
| ہمارا دن تو گزرتا ہے اس تصوّر میں |
| کبھی تو تم بھی کہو گے کہ ہم سے پیار کرو |
| جو مر چکا ہے اسے زندہ کر کے کیا لو گے |
| تم اپنی زندگی پر اپنا انحصار کرو |
| تمہارے سامنے ظاہر ہوئے ہیں کتنے نشاں |
| ہے سچ عزیز تمہیں گر تو اختیار کرو |
| تلاش شمع کرو راستہ جو دکھلا دے |
| اندھیری رات میں طارق کا اعتبار کرو |
معلومات