| ہجر کے نقش سب مِٹا دو نا |
| درد کی بستیاں جلا دو نا |
| کچھ تو بولو کوئی جواب تو دو |
| گر نہیں آ رہے بتا دو نا |
| کیا کروں نیند ہی نہیں آتی |
| دَم کرو کچھ ذرا سُلا دو نا |
| ہے عجب بات پر کہوں کس سے |
| مجھ کو میرا کوئی پتا دو نا |
| یہ مری عادتیں نا تھیں ایسی |
| مانا بگڑی ہیں تم بنا دو نا |
| دَرد تو بڑھ رہا ہے ہر لمحہ |
| تم ہی آ کر کوئی دَوا دو نا |
| پیار ہے تُم سے بے تحاشا ہے |
| کاش تم بھی یہی جَتا دو نا |
| میری آنکھوں کا نور کھویا ہے |
| یار کا گھر کوئی دکھا دو نا |
| چھوڑ شکوے گلے سبھی یاسر |
| گُزری باتیں ہیں سب بھلا دو نا |
معلومات