بے لَوث مخلوق دی پیار تے خدمت، ایّہو راہ ہئی رب نُوں جاندا (پنجابی)

بے لَوث مخلوق دی پیار تے خدمت، ایّہو راہ ہئی رب نُوں جاندا

ہے خُلق عظیم دی اِس وچ رنگت، ایّہو راہ ہئی رب نُوں جاندا

سب دے دُکھڑے رب ہے سُن دا، مخلوق دے لئی خادم چُن دا

خادم پاون رب دی اُلفت، ایّہو راہ ہئی رب نُوں جاندا

مخدومی نالوں وَدھ کے عظمت، خدمت اندر راحت برکت

خدمت وچ ہے اَنحد رحمت، ایّہو راہ ہئی رب نُوں جاندا

خالق خَلق نال پیار ہے کردا، عاشق خَلق نُوں ویکھ کے ٹَھردا

عاشق ویکھے خَلق دی صورت، ایّہو راہ ہئی رب نُوں جاندا

دَر صورت مسکین دی آوے، سخیاں نُوں اوہ خیراں پاوے

دَر شیشہ وحدت ویکھ ہر مُورت، ایّہو راہ ہئی رب نُوں جاندا

رُوح ربانی ہر دے اندر، غریب امیر یا ہووے سکندر

ہے ہر ہر روح دی رب نال سنگت، ایّہو راہ ہئی رب نُوں جاندا

خَلق دے اندر آپ ہے وَسدا، اپنا راہ وی آپ ہے دَسدا

رب دا کُنبہ رب دی قُربت، ایّہو راہ ہئی رب نُوں جاندا

ویکھ پاک نبیؐ دی سیرت نُوں، آقاؐ دے نُور بصیرت نُوں

پیار تُوں وَدھ ہے کیہڑی سُنت، ایّہو راہ ہئی رب نُوں جاندا

نہ رکھ شوق تُوں پیری دا، رکھ تُوں ذوق فقیری دا

فقیری تاں ہے پیار محبت، ایّہو راہ ہئی رب نُوں جاندا

پیار وسیلہ قُرب حضوری، پیار دے باہجھوں نئیں منظوری

پیار ہی تارے دریا وحدت، ایّہو راہ ہئی رب نُوں جاندا

حافظ ماہی گل سمجھائی، ” اَحْبَبْتُ “ پیار دی کھیڈ رچائی

پیار ہی خلوت پیار ہی جلوت، ایّہو راہ ہئی رب نُوں جاندا