| تمہارے ساتھ بھی اب دل لگا کر دیکھ لیتا ہوں |
| جو غم دل میں چھپا ہے وہ بتا کر دیکھ لیتا ہوں |
| ملے جو غم محبت میں انہیں اب بھولنا ہو گا |
| محبت کا نیا اک گیت گا کر دیکھ لیتا ہوں |
| گرانا ہو گا اب ٹوٹے ہوئے خوابوں کو آنکھوں سے |
| تمہارے خواب اب دل میں بسا کر دیکھ لیتا ہوں |
| بہت میں نے اٹھائے ناز نخرے نازنینوں کے |
| تمہارے ناز بھی اب میں اٹھا کر دیکھ لیتا ہوں |
| بھروسا کھو دیا شاہدؔ یہاں کب کا محبت میں |
| تمہیں اب آخری بار آزما کر دیکھ لیتا ہوں |
معلومات