| تیری الفت میں ورے سود و زیاں سے جاؤں |
| دعوئ عشق میں یا ، اپنے بیاں سے جاؤں |
| خون آشام فضا ، رقص میں وحشی پاگل |
| راستہ ہو گیا دشوار کہاں سے جاؤں |
| غیر سے کیا کریں شکوہ جو بنا دے مسجد |
| جب وطن جاؤں میں اپنے تو اذاں سے جاؤں |
| نشّہ طاقت کا جو مخمور کئے رکھتا ہے |
| میں تو مسجد بھی اگر جاؤں تو جاں سے جاؤں |
| میرے اندازِ تکلّم پہ تو قدغن نہ لگا |
| دل ہے ، پتھر تو نہیں ، طرزِ فغاں سے جاؤں |
| دور رکھتی ہے تجھے حق سے فقط بد ظنّی |
| سوچ ! کر لوں جو یقیں ، وہم و گماں سے جاؤں |
| بد زبانی سے وہ جذبات مرے بھڑکائے |
| چاہتا ہو گا کہ میں حسنِ بیاں سے جاؤں |
| گھر میں چور آنے کا دھڑکا تو لگا رہتا ہے |
| در کھلا چھوڑ کے اپنا جو مکاں سے جاؤں |
| کون ہے تیرے سوا ، میرا سہارا مولیٰ |
| میں کہاں جاؤں اگر تیری اماں سے جاؤں |
| کوئی چارہ نہیں طارق جو محبّت کے سوا |
| دل میں ہو ایک خدا ، عشقِ بتاں سے جاؤں |
معلومات