| دل سے توحید کے اقرار کی خوشبو آئی |
| ہر بتِ شرک سے انکار کی خوشبو آئی |
| آ گئے لوگ جو سننے کو تجھے ویسے ہی |
| گفتگو سے انہیں افکار کی خوشبو آئی |
| منہ کی باتوں سے تو قائل نہیں ہوتا کوئی |
| لوگ مانیں گے جو کردار سے خوشبو آئی |
| تیرے اعمال کو بدلے تو کوئی بات بنے |
| تجھ سے گو علم کے انوار کی خوشبو آئی |
| کب کہاں روک سکے پاؤں ، چلے آئے ہم |
| جب کہیں بھی گل و گلزار کی خوشبو آئی |
| اپنی پہچان کرا دیتا ہے وہ پل بھر میں |
| جس کے اخلاق سے اِقدار کی خوشبو آئی |
| لوگ آئیں گے ترے پاس اسی وقت اگر |
| ان کو سلجھے ہوئے اطوار کی خوشبو آئی |
| جو قریب آیا ، چلا آیا اسی گلشن میں |
| اس کو جیسے یہاں ، ازہار کی خوشبو آئی |
معلومات