| موج میں ہر طرف کہ پانی ہے |
| ٹوٹی کشتی بھی بادبانی ہے |
| زندگی شام اک سہانی ہے |
| کہ ابھی نَشَّۂ جَوانی ہے |
| ان کے آنے کی تھی خبر لیکن |
| ہر گھٹا آج پانی پانی ہے |
| آرزوئیں ہزاروں ہیں لیکن |
| چار دن کی یہ زندگانی ہے |
| زخم وہ ہی جو بن گیا ناسور |
| مے وہی ہے جو بس پرانی ہے |
| اپنی اپنی ہے داستاں سب کی |
| سب کی اپنی الگ کہانی ہے |
| اشک تحریر ہےغمِ دل کی |
| گفتگو میری بے زبانی ہے |
| آ کے منزل پہ یہ ہوا معلوم |
| آج تک صرف خاک چھانی ہے |
| جان دے دیں گے آستاں پہ ترے |
| آج پھر دل میں ہم نے ٹھانی ہے |
| سوچ کر سامنے وہ آۓ مرے |
| تیغ جس کو بھی آزمانی ہے |
| زندگی سے ہوئی طلاق تو کیا |
| موت سے اپنا عقدِ ثانی ہے |
| ہم بھی چالاک کم کسی سے نہیں |
| ساری دنیا اگر سیانی ہے |
معلومات