| درد آخر گھٹا دیا ہم نے |
| زندگی کو بڑھا دیا ہم نے |
| حسرتو ں کے پرانے آنگن سے |
| دل کا لاشہ اٹھا دیا ہم نے |
| ایک ہی خواب تھا کنارے پر |
| آنسؤں میں بہا دیا ہم نے |
| آخری چال پر تھے خالی ہاتھ |
| پھر دیا ہی بجھا دیا ہم نے |
| خشک سالی پڑی تھی آنکھوں میں |
| دل کا دریا چڑھا دیا ہم نے |
| موت کو زندگی کے بارے میں |
| شعر اپنا سُنا دیا ہم نے |
| ہوچُکا تھا گلوب گرد آلود |
| آئنے پر گُھما دیا ہم نے |
| آبگاہوں نے احتجاج کیا |
| ایک پنچھی اُڑا دیا ہم نے |
| شاہراہیں گزرنے والی تھیں |
| چل کے رستہ بنادیا ہم نے |
| دھوپ کو برف پہ اُترنا تھا |
| بادلوں کو بچھا دیا ہم نے |
| آخری پیڑ تھا وہ جنگل کا |
| اور مل کر گرا دیا ہم نے |
| تھک چکا تھا یہ جون کا سورج |
| چاندنی میں سُلادیا ہم نے |
| اس برس بھی دُعا کی بارش میں |
| جسم اپنا جلا دیا ہم نے |
| ایک سایہ ملا جو باہر تھا |
| گھر میں لا کر گنوا دیا ہم نے |
| اپنے گاؤں کی چھاؤں سے اُٹھ کر |
| شہر تیرا بسا دیا ہم نے |
| خواب کتنا طویل تھا اس بار |
| خود کو کتنا جگا دیا ہم نے |
| وصل کی بھوک کا گزارہ تھا |
| ہجر میں غم کھلا دیا ہم نے |
| پیاس میٹھی سی لب پہ آئی تھی |
| ایک آنسو پلا دیا ہم نے |
| گرتی دیوار تھی میاں جس کو |
| حال اپنا بتا دیا ہم نے |
| دشت اُبھرا ہے آنکھ میں شیداّ |
| قرض کیسا چُکا دیا ہم نے |
معلومات