| کتنی ہے زندگی ہوئی دشوار کچھ کہو |
| عالم میں جنگ کے ہوئے آثار کچھ کہو |
| یوسف تو آگیا سرِ بازار کب سے ہے |
| “تم بھی اگر ہو اس کے خریدار کچھ کہو” |
| تم ظلم دیکھ کر بھی ہو خاموش کس طرح |
| کہتے ہو خود کو تم بھی تو خود دار کچھ کہو |
| آیا ہے اور بھی کوئی میدانِ جنگ میں؟ |
| دشمن نے ہر طرف سے کی یلغار کچھ کہو |
| کانوں پہ جوں بھی رینگتی دیکھی نہیں کہیں |
| ہم سے ہی کہہ رہے ہیں کہ بے کار کچھ کہو |
| سچ بولنا صحافتی دنیا میں جُرم ہے |
| لکھنے لگے ہیں جھوٹ کے انبار کچھ کہو |
| سب بحر و بر فساد کی زد میں ہیں دِکھ رہے |
| اک ہم ہی تو نہیں ہیں گنہ گار کچھ کہو |
| ساری صدائیں کر چکا خاموش اب عدو |
| امّت کے ایک تم بچے غم خوار کچھ کہو |
| آنکھوں کے سامنے ہوا ہے ظلم اس قدر |
| دکھ کا ہوا ہے سرسری اظہار کچھ کہو |
| رنگین خون سے ہے فلسطیں کی سرزمیں |
| کیسے بنے گا یہ لہو گلزار کچھ کہو |
| امید مغفرت کی لئے آگئے ہیں ہم |
| آشاؤں کے محل نہ ہوں مسمار کچھ کہو |
| طارق زبانِ حال حقیقت بیاں کرے |
| ہر کام ہو گیا ہے پُر اسرار کچھ کہو |
معلومات