تقریر غلط ، نعرہ ءِ تکبیر غلط ہے |
باطل کے لیے اٹھے تو شمشیر غلط ہے |
عکاس ترے فن سے شکایت نہیں لیکن |
ہنستی جو بنائی مری تصویر غلط ہے |
عشاق پہ لازم ہے کہ ہوں پیکرِ تسلیم |
دل بستی میں اوہام کی تعمیر غلط ہے |
جب چھوڑ گیا ہے تو فراموش بھی ہو جا |
پیروں میں پڑی یاد کی زنجیر غلط ہے |
آنکھوں سے نہ ظاہر ہو کبھی حالِ دلِ زار |
اس طور غمِ ہجر کی تشہیر غلط ہے |
شامل ہیں ترے قرب کے لمحات بھی اس میں |
ایسا بھی نہیں ساری ہی تقدیر غلط ہے |
دیکھا ہے کئی بار اسے پاس ، بہت پاس |
یہ خواب نہیں ، خواب کی تعبیر غلط ہے |
فی الفور مٹا آنکھ سے وہ عکسِ دل آویز |
اس کام میں تھوڑی سی بھی تاخیر غلط ہے |
کس واسطے روشن ہے جبیں تیری قمرؔ ، جب |
دیکھا نہیں اس نے تو یہ تنویر غلط ہے |
معلومات