| مرے قلم کو سخن اتنا ہو عطا مولا |
| لکھوں میں حمد کروں میں تری ثنا مولا |
| جہاں کے والی و اپنے حبیب کے صدقے |
| کرو نا دان مجھے طاقتِ دعا مولا |
| نا حور مانگوں نا جنت کا ہے مجھے لالچ |
| اگر جو مانگوں تو مانگوں تری رضا مولا |
| تمہارے نور کے جلووں کو کوئی کیا سمجھے |
| ہے تیری ذات خرد سے بھی ماورا مولا |
| دیارِ درد میں رہنا بڑی صعوبت ہے |
| تو اپنے بندے کو اتنا نا آزما مولا |
| ترے کرم کے سوا چار سو اندھیرا ہے |
| بھٹک گیا ہوں مجھے راستہ دکھا مولا |
| ترا فقیر ہوں مالک ہے آرزو اتنی |
| جو ذات حق ہے کروں اُس سے میں وفا مولا |
| تُو اپنی رحمتِ اولا کا پھر دکھا جلوہ |
| کہ ڈوبتے ہوئے یاسر کو پھر بچا مولا |
معلومات